Isa 55 | NdeIBE | STEP | “Wozani, lonke lina abomileyo, wozani emanzini. Lani lina elingelamali, wozani, lithenge, lidle! Wozani, thengani iwayini lochago ingekho imali lendleko.

Isaiah 55

Ukunxusa kwabomileyo

1 “Wozani, lonke lina abomileyo, wozani emanzini. Lani lina elingelamali, wozani, lithenge, lidle! Wozani, thengani iwayini lochago ingekho imali lendleko.

2 Lichithelani imali kokungasikho kudla lokusebenza kwenu kulokho okungasuthisiyo na? Lalelani, lalelani kimi, lidle okuhle, umoya wenu uzathokoziswa yizibiliboco.

3 Lalelani, lize kimi; lingilalele ukuze umphefumulo wenu uphile. Ngizakwenza isivumelwano esingapheliyo lani, uthando lwami oluqotho olwathenjiswa uDavida.

4 Khangelani, ngimenze waba ngufakazi ebantwini, umkhokheli lomlawuli wabantu.

5 Ngeqiniso lizabiza izizwe elingazaziyo, lezizwe ezingalaziyo zizagijimela kini, ngenxa kaJehova uNkulunkulu wenu. oNgcwele ka-Israyeli, ngoba uselinike inkazimulo.”

6 Mdingeni uJehova esatholakala, mbizeni eseseduzane.

7 Omubi kayekele indlela yakhe loxhwalileyo alahle imicabango yakhe. Kaphendukele kuJehova, uzakuba lesihawu kuye, lakuNkulunkulu wethu ngoba uzamthethelela ngesihle.

8 “Ngoba imicabango yami kayisiyo eyenu, lezindlela zenu kayisizo ezami,” kutsho uJehova.

9 Njengomkhathi uphakeme kulomhlaba, ngokunjalo izindlela zami ziphakeme kulezindlela zenu, lemicabango yami iphakeme kulemicabango yenu.

10 Njengoba izulu longqoqwane kusehla kuvela phezulu, kungaphindi kubuyele khonale kungathambisanga umhlaba kuwenze ununkule ube lamahlumela, ukuze unike umhlanyeli inhlanyelo, lodlayo umnike ukudla,

11 linjalo lelizwi lami eliphuma emlonyeni wami: kaliyikubuya kimi lize, kodwa lizafeza engikufunayo liphumelelise lokho engilithume khona.

12 Lina lizaphuma ngokuthokoza likhokhelwe ngokuthula; izintaba lamaqaqa kuzasusa ingoma phambi kwenu, njalo zonke izihlahla zeganga zizaqakeza izandla zazo.

13 Endaweni yesihlahla sameva kuzamila esamapulanka, lekubeni kube lukhula kuzamila isihlahla sommithili. Lokhu kuzakwenza uJehova adunyiswe, kube yisibonakaliso esingapheliyo, esingayikudilizwa.”